Occitània en Catalonha: de tempses novèls, de novèlas perspectivas

Los actes de l’XIen congrès de l’AIEO, que se tenguèt a Lhèida en junh de 2014, venon d’espelir. Aquel volum recampa de contribucions de gaireben un centenat de cercaires en provenença de mai de quaranta universitats.

Tre ara, podètz descargar l’integralitat dels actes a l’adreiça seguenta:

Pel primièr còp, los actes d’un congrès de l’AIEO son disponibles a l’encòp en version electronica (de nauta qualitat grafica) e en version papièr. Compte tengut de la devisa del congrès (‘de novèls tempses, de novèlas perspectivas’), la tòca es de rendre mai facila lor consultacion a totes los cercaires interessats per la lenga, la literatura e la cultura occitanas, ont que se tròben, d’un cap a l’autre de la planeta, e de profechar a l’encòp dels elements positius de las novèlas tecnologias: consultacion en linha, cercador especific, mai d’una possibilitat de descargament, de recèrca o d’impression, entretant. Ne vaquí la referéncia bibliografica:

CARRERA, Aitor; GRIFOLL, Isabel (eds.) (2017): “Occitània en Catalonha: de tempses novèls, de novèlas perspectivas. Actes de l’XIen Congrès de l’Associacion Internacionala d’Estudis Occitans”. Barcelona; Lhèida:Generalitat de Catalonha; Institut d’Estudis Ilerdencs. En linha: http://llengua.gencat.cat/web/.content/documents/publicacions/btpl/arxius/21_Occitania_en_Catalonha.pdf

Per quant a la version numerica, s’agís pas d’una simpla mesa en linha de
documents mai o mens adobada per l’escasença, mas de la publicacion d’un
libre electronic que compren totas las compausantas d’un libre
convencional, mas al format numeric. L’inclusion dels actes dins la
colleccion “Biblioteca tècnica de política lingüística” n’assegurarà,
despersé, una difusion importanta, tanben al nivèl institucional. Mercejam
lo Departament de la Cultura de la Generalitat de Catalonha tant coma
l’Institut d’Estudis Ilerdencs de la Deputacion de Lhèida de lor sosten a
la publicacion d’aquestes actes.

Trobaretz qualques imatges del congrès de Lhèida en clicant sus aqueste
ligam: http://aieo2014.blog.cat/imatges

En vos mercejant un còp de mai per vòstra participacion al congrès, vos
saludam plan coralament dins l’espèr de vos tornar veire plan lèu as Albi.

Aitor Carrera e Isabel Grifoll
Cadièra d’Estudis Occitans
Universitat de Lhèida

Administració